एक वर्षमा नेपाल भित्रियो तीन अर्बको विदेशी मदिरा

काठमाडौंँ, ११ साउन । पछिल्लो एक वर्षमा नेपालले विभिन्न देशबाट दुई अर्ब ९८ करोड ५३ लाख ३० हजार रुपैयाँको मदिरा आयात गरेको छ ।

भन्सार विभागका अनुसार गत आर्थिक वर्ष २०७९/८० मा नेपालले उक्त रकम बराबरको विभिन्न मदिरा आयात गरेको हो ।
२०७९ साउन १ गतेदेखि २०८० असार मसान्तसम्म उक्त रकममा ३३ लाख ५६ हजार १४८ लिटर विभिन्न प्रकारका मदिरा नेपाल भित्रिएको विभागले जनाएको छ ।

विभागको तथ्याङ्कअनुसार उक्त पछिल्लो एक वर्षमा दुई अर्ब ८४ लाख सात हजार रुपैयाँको ह्विस्की, २४ करोड ९१ लाख १५ हजार रुपैयाँको वाइन, १७ लाख ८६ हजार रुपैयाँको रम, दुई करोड २३ लाख ६ हजार रुपैयाँको जिन र चार करोड ४२ लाख ८१ हजार रुपैयाँका भोड्का नेपालले आयात गरेको छ ।