बिजुली पसलमा आगलागी

पोखरा, २० वैशाख । पोखराको चाउथेस्थित एक बिजुली पसलको गोदाममा आगलागी भएको छ । प्रहरीका अनुसार बुधबार राति आगलागी हुँदा १ करोड हाराहारीको क्षति भएको छ ।

 साङ्ग्रिला सप्लायर्स बिजुली पसलको गोदाममा आगलागी भएको स्थानीयले देखेपछि प्रहरीलाई खबर गरेका थिए । प्रहरी, सशस्त्र प्रहरीसँगै स्थानीय र दमकलले आगो नियन्त्रणमा लिएका छन् । आधा घण्टामा आगो नियन्त्रणमा आए पनि क्षति भने बढी भएको बताइएको छ । 

प्रारम्भिक अनुसन्धानमा विद्युत् सर्ट भई आगलागी भएको अनुमान गरिएको कास्की प्रहरीले जनाएको छ । यसबारे थप अनुसन्धान भइरहेको प्रहरीले जनाएको छ ।