टिपरले ठक्कर दिँदा एक जना साइकल यात्रीको मृत्यु

काठमाडौँ, १५ जेठ । काठमाडौँको स्वयम्भुमा टिपरले ठक्कर दिँदा एक जना साइकल यात्रीको मृत्यु भएको छ ।   

प्रहरीका अनुसार आज बिहान स्वयम्भुको भगवानपाउमा टिपरले ठक्कर दिँदा गोरखाको अजिरकोट गाउँपालिकाका ३० वर्षीय विकास नेपालीको मृत्यु भएको हो । उनको उपचारको क्रममा मनमोहन अस्पतालमा मृत्यु भएको हो ।

डल्लुबाट भगवानपाउतर्फ जाँदै गरेको बा ५ ख १४७१ नम्बरको टिपरले सोही दिशातर्फ जाँदै गरेको साइकललाई ठक्कर दिएको थियो । ठक्कर दिने टिपर चालकलाई प्रहरीले नियन्त्रणमा लिएको छ ।