समाचार

कुटपिटबाट एक जनाको मृत्यु, तीनजना घाइते



काठमाडौँ, २१ असार । पाँचथरमा अज्ञात समूहको कुटपिटबाट एकजनाको मृत्यु भएको छ भने तीनजना घाइते छन् ।

प्रहरीका अनुसार कुटपिटबाट फिदिम नगरपालिका–१४, आहालका ३७ वर्षीय दिनेशकुमार राईको मृत्यु भएको हो । गएराति गाउँकै धनकुमार राईको घरमा राखिएको चिन्ता (धामीझाँक्री) हेर्न गएका दिनेशसहित परशु राई, ध्रुव राई र पुस्कर विकमाथि १५–२० जनाको समूहमा आएका व्यक्तिले कुटपिट गरेका थिए । घाइते चारैजनालाई उपचारका निम्ति जिल्ला अस्पताल फिदिम ल्याइएको थियो ।

उपचारका क्रममा दिनेशको आज बिहान मृत्यु भएको हो । घाइतेमध्ये धुव्र र पुस्कर विक सामान्य उपचारपछि अस्पतालबाट ‘डिस्चार्ज’ भएका छन् । कुटपिटमा संलग्न व्यक्तिको पहिचान हुन बाँकी रहेको प्रहरीले जनाएको छ ।