सवारी दुर्घटनामा एक जनाको मृत्यु

काठमाडौँ, १ भदौ । दाङमा सवारी दुर्घटनामा परी एक जनाको मृत्यु भएको छ । 

इलाका प्रहरी कार्यालय तुलसीपुरका अनुसार दाङको दंगीशरण गाउँपालिका–५ का २५ वर्षीय सम्राट गिरीको दुर्घटनामा परी मृत्यु भएको हो ।  

शुक्रबार राति १० बजेतिर तुलसीपुर बजारदेखि पश्चिमतर्फ जाँदै गरेका गिरी सवार लु प्र०२–००१ प ०९४६ नम्बरको मोटरसाइकल दंगीशरण– ५ डाँडाचिसमा रोकेर राखेको रा १ त १४२२ नम्बरको ट्याक्टरमा पछाडिबाट ठोक्किएको थियो । 

गम्भीर घाइते गिरीलाई उपचारका लागि तुलसीपुरस्थित राप्ती प्रादेशिक अस्पतालमा लगिएको थियो । उपचारको क्रममा सम्राटको मृत्यु भएको प्रहरीले जनाएको छ ।