प्रकाश तामाङलाई तत्काल नागरिकता दिन प्रधानमन्त्री ओलीको निर्देशन

काठमाडौँ, १२ भदौ । प्रधानमन्त्री केपी शर्मा ओलीले प्रकाश तामाङलाई तत्काल नागरिक दिने व्यवस्था गर्न निर्देशन दिनुभएको छ ।

विद्या चापागाईले तयार पार्नुभएको हेर्ने कथामा तामाङको जीवनी प्रसारण गर्नुभएको थियो । सोही कार्यक्रम मार्फत नै तामाङको मुख्य समस्या नागरिकता भएकाले नागरिक भएपछि मात्र अन्य काम गर्न सकिने भएकाले गृहसचिव एकनारायण अर्याललाई बोलाएर सहजिकरणको लागि निर्देशन दिनुभएको हो । गृहसचिव अर्यालले दुईचार दिनभित्र नै तामाङलाई नागरिकता उपलब्ध गराउने वातावरण तयार पार्ने प्रतिवद्धता नजानउभनुभयो ।

प्रधानमन्त्री ओलीले आफ्नो सामाजिक सञ्जालमा भन्नुभएको छ, ‘हेर्ने कथामा प्रकाश तामाङको कथा हेरेपछि मैले सचिवालयका साथी मार्फत प्रस्तोता विद्या चापागाईंलाई फोन गरेँ । उहाँ व्यस्त रहेकाले त्यसबेला कुरा हुन सकेन। पछि सचिवालयको विद्या चापागाईं र प्रकाश तामाङसँग सम्पर्क भयो। प्रकाशलाई तत्कालको आवश्यकता नागरिकता नै रहेको बुझियो । नागरिकता भए मात्र उहाँको बैंक खाता खोल्न सकिने र सहयोग गर्न चाहनेहरूले सहयोग गर्न मिल्ने हुन्छ । नागरिकता छिटो बनाउने विषयमा राति १० बजे नै गृहसचिव एकनारायण अर्याललाई बोलाएर उहाँसँग कुरा भयो । उहाँले प्रकाशलाई दुईरचार दिन भित्रैमा नागरिकता दिलाउन सहजीकरण गर्ने व्यवस्था मिलाउनु भएको छ र यो खबर प्रकाशलाई पनि पठाइसकिएको छ । नागरिकता प्राप्त गरिसकेपछि प्रकाशलाई आवश्यक सहयोग गर्ने विषयमा पनि कुरा भएको छ ।’