स्पा सेन्टरबाट ८ बालिकाको उद्धार

काठमाडौँ, १८ असार । पोखराको लेकसाइडस्थित विभिन्न स्पा सेन्टरहरुबाट ८ बालिकालाई प्रहरीले उद्धार गरेको छ ।

जिल्ला प्रहरी कार्यालय कास्कीका अनुसार इभेन्डर ब्युटि एण्ड स्पाबाट ४ जना तथा ताराहिल लज स्पा एण्ड ब्युटिकेयर र पर्सल्यान स्पाबाट २–२ जना गरी ८ जनालाई उद्धार गरिएको हो ।

स्पा सेन्टरहरुमा १८ वर्ष मुनिका बालिकाहरुलाई काममा लगाइएको सूचना पाएपछि जिल्ला प्रहरी कार्यालय कास्की र पोखरा महानगरपालिकाको सामाजिक विकास महाशाखाबाट उद्धार टोली खटिएको थियो । सो टोलीले असार १६ गते ८ जनालाई उद्धार गरेको जानकारी कास्की प्रहरीले असार १७ गते रातिमात्र दिएको हो ।

स्पा सेन्टर सन्चालकलाई कारबाहीका लागि उद्धार गरिएका बालिकाहरुलाई श्रम तथा रोजगार कार्यालय पोखरामा पठाइएको प्रहरीले जनाएको छ ।