काठमाडौं, १९ वैशाख । राष्ट्रपति विद्यादेवी भण्डारीले स्थानीय तहको चुनाव तयारीबारे प्रधानमन्त्री पुष्पकमल दाहालसँग चासो राखेकी छन् । शीतल निवासमा सोमबार बिहान भेटदै उनले तोकिएको मितिमा चुनाव सम्पन्न गर्न भइरहेका तयारीबारे जानकारी लिएकी हुन् ।
प्रधानन्यायाधीश सुशीला कार्कीविरुद्ध कांग्रेस र माओवादी केन्द्रले संसद्मा दर्ता गरेको महाअभियोग प्रस्तावबारे समेत राष्ट्रपतिले जिज्ञासा राखेकी थिइन् । प्रधानमन्त्री दाहालले महाअभियोगको प्रसंगले तोकिएको मितिमै चुनाव सम्पन्न गर्न कुनै बाधा नपर्ने जानकारी गराएका थिए ।
‘वैशाख ३१ मा चुनाव गर्ने पूर्ण तयारीमा सरकार छ । महाअभियोगले केही बाधा पुग्दैन,’ दाहालको भनाइ उद्धृत गर्दै उनका प्रेस सल्लाहकार गोविन्द आचार्यले बताए ।
सरकारको अगुवाइ गरेका माओवादी केन्द्र र कांग्रेसका सांसदहरूले आइतवार प्रधानन्यायाधीश कार्कीविरुद्ध महाअभियोग प्रस्ताव दर्ता गराएका थिए । राष्ट्रपति भण्डारीले आकस्मिक तवरले त्यसरी प्रस्ताव ल्याइनुको कारण र त्यसको प्रभावबारे समेत जिज्ञासा राखेकी थिइन् ।
दाहालले महाअभियोग फरक प्रसंग भएको र यसले चुनावी तयारीलाई कुनै रोकतोक नगर्ने बताएका थिए । ‘सांसदहरूले संविधानअनुसार अधिकार प्रयोग गरी महाअभियोग प्रक्रिया बढाएका हुन्।
कार्यपालिकाको काममा हस्तक्षेप गरी शक्ति सन्तुलन खलबल्याएकाले त्यस्तो प्रस्ताव ल्याइएको उनले राष्ट्रपतिलाई जवाफ दिएका थिए । राष्ट्रपति भण्डारीले कुनै अवस्थामा पनि स्थानीय तहको चुनावलाई नरोक्न सुझाव दिएकी थिइन् । कान्तिपुरमा समाचार छ ।
प्रतिक्रिया दिनुहोस्