अमेरिकामा तुफान : कम्तीमा २३ जनाको मृत्यु

एजेन्सी, २० फागुन । अमेरिकामा शक्तिशाली तुफान (टोर्नाडो)का कारणले कम्तीमा २३ जनाको मृत्यु भएको छ ।

बीबीसीका अनुसार साेमबार बिहान स‌ंयुक्त राज्य अमेरिकाकाे ली काउन्टीमा टोर्नाडोका कारण केही बालबालिकासहित कम्तीमा २३ जनाको ज्यान गएको र सङ्ख्या अझै बढ्न सक्ने जनाएको छ ।

त्यहाँका राष्ट्रिय माैसम विभागका अनुसार टोर्नाडो करिब एक किलोमिटर फराकिलाे बाटो बनाउँदै १ सय ६५ माइल प्रति घण्टाको रफ्तारमा चलेको थियो । उक्त तुफान (टोर्नाडो)ले कयौँ घर तथा भवन भत्किएका छन् । अहिले अधिकारीहरुले त्यो क्षेत्रमा जान निषेध गरेका छन् ।

ली कन्टीका स्थानीयले अहिलेसम्मकै शक्तिशाली तुफान भएको बताएका छन् । उद्धारकहरु अहिले पनि कतिपय क्षेत्रमा उद्धारको लागि खटिरहेका छन् । अल्बामा मेडिकल केन्द्रले बताए अनुसार ४० जना घाइतेहरुको उपचार भइरहेको छ र अझै सङ्ख्या बढ्न सक्ने अनुमान गरिएको छ ।