विकास र समृद्धिको महत्वपूर्ण माध्यम शिक्षा : प्रधानमन्त्री ओली

काठमाडौँ, ४ वैशाख । प्रधानमन्त्री केपी शर्मा ओलीले विकास र समृद्धिको महत्वपूर्ण माध्यम शिक्षा  रहेको बताएका छन ।

विद्यालय भर्ना अभियानका सन्दर्भमा आज बालुवाटारमा नेकपा निकट यूवा र विद्यार्थीहरुसँग अन्तरक्रिया गर्दै प्रधानमन्त्री ओलीले नेपाललाई निरक्षरहरुको होइन विद्वानहरुको देश बनाउनु पर्ने बताएका छन ।

उनले भने, ‘विकास र समृद्धिको महत्वपूर्ण माध्यम शिक्षा हो । हामीले समृद्धि हासिल गर्नका लागि शिक्षाको स्तर उठाउनु पर्दछ । यसका लागि तपाईंहरुको भूमिका महत्वपूर्ण हुन्छ । यसबर्ष देखि विद्यालय उमेरका कोही बालबालिका पनि विद्यालय बाहिर हुनुहुदैन ।’

प्रधानमन्त्री ओलीले युवा र विद्यार्थीहरुले अब सृजनशिल र समाज सुधारको काममा लाग्नका लागि कुनै अवरोध नरहेको बताउदै उनले भने, ‘अब राजनीतिक संघर्ष र आन्दोलन गर्नुपर्ने दिन सकिएका छन्’ प्रम ओलीले भन्नुभयो ‘अब युवाहरुले समाज सुधारका लागि शिक्षा, स्वास्थ्य, श्रम, सीप र उत्पादन जस्ता कुरामा ध्यान दिनु पर्दछ ।’

बालबालिका विद्यालय भर्नाका लागि अभिभावक सचेतना सञ्चालन गर्नुपर्ने बताउदै उनले भने,  ‘शिक्षाको महत्व अभिभावकलाई बुझाउनु पर्दछ ” प्रम ओलीले भन्नुभयो “त्यसपछि मात्र उनीहरुलाई छोराछोरी पढ्न पठाउछन् ।’