जनताले चाहेजस्तै विकास हुन्छ : मुख्यमन्त्री राई

काठमाडौँ, १० कार्तिक । मुख्यमन्त्री शेरधन राईले प्रदेश नम्बर १ मा जनताले चाहेजस्तै विकास गरेर छाड्ने बताएका छन् ।

नेपाल कम्युनिष्ट पार्टी नेकपा नगर कमिटी भोजपुरले आयोजना गरेको शुभकामना आदान–प्रदान तथा चियापान कार्यक्रमलाई सम्बोधन गर्दै मुख्यमन्त्री राईले स्रोत र साधनलाई अधिकतम प्रयोगमा ल्याएर विकासको चरणमा अगाडि बढाउने धारणा राखेका राखेका थिए ।

उनले भने, ‘यो प्रदेशलाई समृद्ध बनाउने गरी मैले काम अगाडि बढाएको छु, प्रदेशसँगै भोजपुर पनि समृद्धिको बाटोमा अगाडि बढ्छ ।’ ‘तपाईँ हामी यो देशका सचेत नागरिक हौं । हामीले प्रत्येक सेकेन्ड समयको महत्वलाई बुझेर जिम्मेवारी वहन गर्न आवश्यक छ ।’

प्रदेश सरकारले विकासका लागि प्राथमिकताका आधारमा प्रशस्त बजेट विनियोजन गरेको भए पनि काममा सोचेअनुरुप खर्च नभएको भन्दै उनले चिन्ता व्यक्त गरेका थिए ।

उनले भने, ‘विकास गर्नका लागि हामीले करोडौँ बजेट छुट्याएका छौँ र काम पनि भइरहेको छ तर जनताको तर्फबाट पनि भइरहेको काममा निगरानी र खबरदारी हुनुपर्‍यो ।’

मुख्यमन्त्री राईले भोजपुरको मुन्दुम ट्रेलको विकासका लागि रु दुई करोड विनियोजन गरेको बताउदै उनले जिल्लाका ठूला सडक र पक्की पुलको काम आफ्नै कार्यकालमा सम्पन्न गर्ने बताए ।