सावधानी नअपनाए लकडाउन हुन सक्छ, सचेत बनौँ: प्रधानमन्त्री ओली

काठमाडौँ, २८ चैत । प्रधानमन्त्री केपी शर्मा ओलीले दोस्रो चरणको कोरोनाबाट बच्नका लागि पुनः लकडाउन हुनसक्ने बताउनुभएको छ ।

शनिबार नेपाल उद्योग वाणिज्य महासंघको ५५औँ वार्षिक साधारणसभामा बोल्दै केही दिनअघि स्वास्थ्य तथा जनसंख्या मन्त्रलायले दिएको निर्देशन पालना नगरिएको खण्डमा लकडाउन हुनसक्ने उहाँले बताउनुभएको हो । उहाँले भन्नुभयो, ‘सचेत नबने फेरि लकडाउनमा पुग्दैनौँ भन्ने छैन । आफैँ सचेत बनौँ । सामाजिक जीवनलाई खलबलिन नदिन, सावधानी अपनाएनौँ भने समस्या आउनसक्छ । समयमै सचेत बनौँ ।’

शुक्रबार मन्त्रालयले कोभिड(१९ संकट व्यवस्थापन केन्द्र (सिसिएमसी)लाई विद्यालयलगायत भीडभाडयुक्त क्षेत्र बन्द गर्न सिफारिस गरिसकेको छ । अहिले यस विषयमा सिसिएमसीको बैठक भइरहेको जनाइएको छ ।