प्रधानमन्त्रीद्वारा एसियन सेन्ट्रल जोन महिला भलिबलको उपाधि जित्‍ने टोलीलाई बधाई

काठमाडौँ, १३ पौष । प्रधानमन्त्री शेरबहादुर देउवाले लगातार दोस्रो पटक एसियन सेन्ट्रल जोन महिला भलिबलको उपाधि जित्ने नेपाली राष्ट्रिय महिला टोलीलाई बधाई दिएका छन् ।

आज सामाजिक सञ्जालमार्फत प्रधानमन्त्री देउवाले नेपाली राष्ट्रिय महिला टोलीलाई बधाई दिएका हुन् । बंगलादेशमा मंगलबार भएको फाइनलमा नेपालले उज्वेकिस्तानलाई हराएर उपाधि रक्षा गरेको हो ।

रोमाञ्चक फाइनलमा नेपालले उज्वेकिस्तानलाई ३-२ को सेटमा पराजित गरेको थियो । नेपालले कूल ६ खेल खेल्दा अपराजित रहँदै च्याम्पियन बनेको हो ।