मेरो होइन प्रधानमन्त्री देउवाको दिमाग खुस्केको हुनुपर्छ: नेता रावल

काठमाडौँ, ३० फागुन । एमसीसीको विषयमा प्रधानमन्त्री शेरबहादुर देउवाले एमाले नेता भीम रावलमाथि आक्रोश पोखेपछि रावलले पनि जवाफ फर्काउनुभएको छ ।

सोमबार नुवाकोटमा आयोजित एक कार्यक्रममा प्रधानमन्त्री देउवाले एमाले नेता रावल आफैं मन्त्रिपरिषदमा रहँदा सो परियोजना पास गरेको तर अहिले आएरमात्र विरोध गरेको भन्दै आक्रोश व्यक्त गर्नुभएको थियो । कार्यक्रममा प्रधानमन्त्री देउवाले भन्नुभएको थियो, ‘रावल रक्षामन्त्री भएको बेला एमसीसी सम्झौता मन्त्रिपरिषदबाट पारित भई संसदमा ल्याएको, अहिले विरोध गरेर दुईजिब्रे कुरा गर्ने, त्यसबेला राजीनामा किन नगरेको ? त्यसबेला ‘दिमाग खुस्केको थियो ।’

यसबारे ट्वीटरमार्फत जवाफ फर्काउँदै रावलले आफू केपी ओली पहिलो पटक प्रधानमन्त्री हुँदा उपप्रम र रक्षा मन्त्री भएको उल्लेख गर्दै ओलीले एमसीसीसँगको सम्झौता संसदमा ल्याएको बेला नभएको बताउनुभयो । एमसीसी सम्झौताका राष्ट्रघाती प्रावधानलाई आफूले तथ्यगतरूपमा सार्वजनिक गर्दा देउवा आक्रोशित भएको पनि उहँँको भनाइ छ । नेता रावलले देउवालाई थप वहस गर्ने इच्छा भए आफू तयार भएको पनि बताउनुभयो ।

उहाँले भन्नुभएको छ, ‘अतः मेरो मन्त्रिपरिषद्मा सहमति रहेको भन्ने कुरै रहेन। यस्तो सार्वजनिक तथ्यको जानकारीसम्म नराखी झुठा बोल्ने प्रधानमन्त्रीको या त आफ्नै दिमाग खुस्केर होस हराएको हुनुपर्छ या जनतामा भ्रम छरेर देशहीत विरुद्धको कृत्य छोप्ने कुत्सित चाल हुनुपर्छ । किन रावललाई मात्र टाउको दुख्छ ? नेपालको संविधान, देश र जनता सामु राष्ट्रिय स्वाधीनता र हितको पक्षमा कसैको डर नमानी काम गर्ने शपथको विपरीत एमसीसी सम्झौताका देशघाती प्रावधानको निहित स्वार्थका लागि अन्ध समर्थन गर्ने, संसद नियमावली र संविधान मिचेर, जनआवाजमाथि दमन गरेर वाह्य शक्तिलाई रिझाउन होहल्लाको बीचमा सम्झौता अनुमोदन गराउने, महाकाली र कर्णालीमा देशघात गर्न नहच्किने तपाईको जस्तो चरित्र नभएकोले म जस्तो देशभक्त नागरिकको राष्ट्रको हित र अस्मिताप्रति चिन्तित भएर टाउको दुखेको हो।’