टोखा–छहरे सुरुङमार्ग निर्माण सुरु गर्न लागेका छौँ : अर्थमन्त्री महत

त्रिशूली, २४ बैशाख । अर्थमन्त्री डा. प्रकाशरण महतले काठमाडौंको टोखाबाट नुवाकोटको छहरेसम्मको सुरुङमार्ग निर्माण कार्य थालनी गर्न लागिएको बताएका छन् ।

नुवाकोटको दुप्चेश्वर गाउँपालिका–४, बेतिनीस्थित छेवाङ ग्लान ङारछ्यालिङ गुम्बामा निर्मित गुरु पद्मसम्भवको शनिबार मूर्तिको प्राण प्रतिस्थापन कार्यक्रमलाई सम्बोधन गर्दै उनले सुरुङमार्ग निर्माणका लागि धेरै पहिलेदेखि बहस भए पनि अब काम सुरु गर्न आवश्यक बजेटको विनियोजन गर्ने बताए ।

“नुवाकोटसहित रसुवा हुँदै चीनसँगको केरुङ बजारसँगको व्यापार बढाउन टोखा–छहरे सुरुङमार्गको परिकल्पना गरिएकाले कार्यान्वयनमा लैजान लागिएको हो,” उनले भने, “कृषि र पर्यटनको विकास, उद्योग, व्यवसायको वृद्धि, धार्मिक तथा सांस्कृृतिक गतिविधिलाई चलायमान बनाएर केरुङ हुँदै चीनसँगको व्यापार बढाउन के कति सकिन्छ, आगामी आर्थिक वर्षमा बजेट तर्जुमा गर्न लागिएको छ । यसलाई कार्य प्रारम्भका रूपमा लिनुपर्छ ।”

संघीय सरकार आउँदो आर्थिक वर्षको तयारीमा रहेकाले उत्पादक र ठूला योजनाका क्षेत्रमा बजेटले प्राथमिकता पाउने नेपाली कांग्रेसका प्रवक्ता समेत रहेका डा. महतको भनाइ छ ।

“विकास निर्माणलाई कांग्रेसले सदैव प्रथामिकता दिँदै आएको छ । जनताको सुखदुःख, विकास निर्माण, धर्म र संस्कृति तथा मानवीय जीवनसँग जोडिएका पक्षमा काम गर्दै आइरहेको छ,” उनले भने, “अहिले अर्थतन्त्र अप्ठ्यारो परिस्थितिको भएकाले धेरै अपेक्षा नराख्न तर राम्रा र नमुना कामको थालनी हुन्छ भन्नेमा ढुक्क हुनुहोस् ।”

उनले बुद्धपछिको बुद्ध भगवान्का रूपमा सम्मानित भगवान् पद्मसम्भवको मूर्तिको स्थापनाले धार्मिक र सांस्कृतिक संरक्षणमा सहयोग पुग्ने बताए । “दण्ड–जरिवाना गराउने कानुनभन्दा नैतिकवान् बनाउने धर्म, संस्कार र मान्यताले हामी चलेका छौँ,” उनले भने, “हजारौँ वर्षदेखि मानिस एकार्काप्रति सद्भाव कायम राख्दै जीवन चलाइरहेका छाँै । त्यो हाम्रो महान् धर्म, संस्कृति र त्यसले सिकाएको पाठको नतिजा हो ।”

एक हजार २०० वर्षअघि बुद्ध धर्मको प्रचारमा तिब्बत र नेपाली भूमिमा योगदान पुर्‍याएका गुरु पद्मसम्भवलाई बौद्ध धर्मालम्वीले बुद्धपछिको बुद्ध भगवान्को अवतारका रूपमा पुज्ने गरेका छन् । उनले सिकाइको पाठलाई अनुशरण गर्दै बौद्ध दर्शन अध्ययन केन्द्रका रूपमा छेवाङ ग्लान ङारछ्यालिङ गुम्बामा गुरु पद्मसम्भवको मूर्ति प्रतिस्थापन गरिएको गुम्बा व्यवस्थापन समितिका सल्लाहकार योविन्द्रसिंह तामाङले जानकारी दिए । रासस