बंगलादेशमा हिंसात्मक प्रदर्शनः ६ जना विद्यार्थीको मृत्यु, शिक्षण संस्थाहरू बन्द

काठमाण्डौ, २ साउन । बंगलादेशमा हिंसात्मक प्रदर्शन भएको छ । रोजगारीमा आरक्षणविरुद्ध भएको प्रदर्शन हिंश्रक बन्दा ६ जनाको मृत्यु भएको छ । यो घटनापछि बंगलादेशका विद्यालय तथा विश्वविद्यालयहरू अर्को आदेश नआउन्जेलसम्मका लागि बन्द गरिएको छ ।

बंगलादेशमा सरकारी सेवामा स्वतन्त्रताका लागि लड्नेहरूका सन्ततिलाई आरक्षण दिने गरिएको छ । सन् १९७१ मा पाकिस्तानसंगको लडाइँपछि बंगलादेश स्वतन्त्र भएको थियो । त्यसमा लड्नेहरूका सन्ततिलाई आरक्षण दिने गरिकएको छ ।

तर, प्रधानमन्त्री शेख हसिनालाई समर्थन गर्ने सरकार समर्थित समूहका बालबालिकाले यसको अनुचित लाभ लिने भन्दै कतिपयले यसको विरोध गरेका छन् । बंगलादेशमा यो आरक्षणविरुद्ध प्रदर्शन चलिरहेको थियो ।

विरोधकै कारण सन् २०१८ मा आरक्षणको यो व्यवस्थामा रोक लगाइएको थियो । तर, बंगलादेशको एक अदालतले आरक्षणको यो व्यवस्थालाई पुनः बहाल गरिदिएको थियो ।