जिप दुर्घटना हुँदा ३ जनाको मृत्यु, ११ जना घाइते

काठमाडौँ, ३१ साउन । सिन्धुलीमा जिप दुर्घटना हुँदा तीन जनाको मृत्यु भएको छ भने ११ जना घाइते भएका छन् ।

जिल्ला प्रहरी कार्यालय सिन्धुलीका आज बिहान सवा ९ बजेतिर कमलामाई नगरपालिका–२ चियाबारी नजिक बीपी राजमार्गमा गोलञ्जोरबाट सिन्धुलीतर्फ आउँदै गरेको बा २० च ८२८३ नम्बरको जिप आफैं अनियन्त्रित भई दुर्घटनामा परेको थियो ।

उक्त दुर्घटनामा मृत्यु हुनेहरुमा सिन्धुलीकै गोलञ्जोर गाउँपालिका–६ नाकाजोलीका ४२ वर्षीय पृथ्वी भुजेल, सोही ठाउँका ४५ वर्षका उदयबहादुर मस्राङ्गी र ३५ वर्षका पवन मस्राङ्गी रहेका छन ।

दुर्घटनामा ११ जना घाइते भएका छन् । जसमध्ये जिप चालक गोलञ्जोर–६ का ३२ वर्षीय टीकाजंग राई (हायु) को अवस्था गम्भीर रहेको प्रहरीले बताएको छ ।

त्यसैगरी सोही ठाउँकै २२ वर्षीय उदय मगर, १७ वर्षीया मेनुका मगर, १८ वर्षीया जिना श्रेष्ठ, पवन मर्स्याङ्गी, ४७ वर्षीया धनमाया वाइबा, २४ वर्षीया निला मगर, २२ वर्षीया समिना मगर, १९ वर्षीया बन्दना कोइराला, ३७ वर्षीय हिमाल परियार र कमलामाई–५ कि ७८ वर्षीया डम्बर कुमारी कार्की घाइते छन् ।

उनीहरुको जिल्ला अस्पताल सिन्धुलीमा उपचार भइरहेको छ ।