बैंकमा ब्याजदर घट्दा टेलिकमको नाफा प्रभावित

काठमाडौँ, ३० कार्तिक । बैंकमा ब्याजदर घट्दा नेपाल टेलिकमको नाफामा प्रत्यक्ष प्रभाव परेको छ ।

टेलिकमले प्रकाशित गरेको चालु आर्थिक वर्षको पछिल्लो तीन महिनाको वित्तीय विवरण अनुसार बैंकले १ अर्ब ७३ करोड रुपैयाँ नाफा कमाएको छ । अघिल्लो वर्षको यो समयमा २ अर्ब २ करोड रुपैयाँ बराबरको नाफा कमाएको थियो । 

यो अवधिमा टेलिकमले वित्तीय लगानीबाट प्राप्त हुने आम्दानी १ अर्ब १७ करोड बराबर गरेको छ । अघिल्लो वर्ष यस्तो आम्दानी १ अर्ब ७५ करोड रुपैयाँ बराबर थियो । टेलिकमले अघिल्लो वर्षको तीन महिनामा ८ अर्ब ५८ करोडको व्यापार गरेकोमा अहिले १० करोड रुपैयाँले बढेर ८ अर्ब ६८ करोड पुगेको छ ।

अघिल्लो वर्षको तीन महिनामा २ अर्ब ५ करोड रहेको कर्मचारी खर्च अहिले १ अर्ब ७४ करोडमा झरेको छ । सञ्चालन खर्चमा सामान्य वृद्धि भएर १ अर्ब ५४ करोड पुग्दा नियामकीय खर्च १ अर्ब ९० करोडबाट १ अर्ब ५ करोड रुपैयाँमा झरेको छ ।