विमानस्थलबाट सुनसहित एक जना पक्राउ

काठमाडौँ, २३ पौष । त्रिभुवन अन्तर्राष्ट्रिय विमानस्थलबाट भन्सार छली गरी लैजान लागेको करिब ६१ ग्राम तौल बराबरको सुनसहित एक जना पक्राउ परेका छन् ।

चितवन भरतपुर महानगरपालिका-१२ घर भएका २५ वर्षीय सञ्जय तामाङलाई सोमबार बिहान प्रहरीले पक्राउ गरेको हो ।

उनको साथबाट सुनको ढिक्का १ थान र औँठी १ थान प्रहरीले बरामद गरेको छ । एयर इन्डियाको उडानद्वारा दोहाबाट काठमाडौँ आएका उनलाई विमानस्थलको अन्तर्राष्ट्रिय उडानतर्फको आगमन टनेल गेटबाट उक्त धातु सहित फेला पारी प्रहरीले पक्राउ गरेको हो ।  

उनलाई आवश्यक अनुसन्धान तथा कारबाहीको लागि त्रिभुवन विमानस्थल भन्सार कार्यालय गौचरमा बुझाइएको छ ।