काठमाडौँको एक मन्दिरमा सुरक्षित छु : दुर्गा प्रसाईं

काठमाडौँ, १७ चैत । प्रहरीले खोजिरहेका राजावादी प्रदर्शनका ‘कमान्डर’ दुर्गा प्रसाईंले आफू हाल काठमाडौँको कुनै एक मन्दिरमा बसेको बताएका छन् ।

प्रसाईले आफ्नो महाअभियान फेसबुकमार्फत आज एक भिडियो सन्देश जारी गरेका हुन् । गएको शुक्रबार (चैत १५) काठमाडौंको तीनकुनेमा राज्यले आफूलाई मार्ने उद्देश्यले हिंसा भड्काएको र दमन गरेको उनले आरोप लगाएका छन् । निजी घरको छतमा प्रहरी जाँदा अवस्था बिग्रेको उनको भनाइ छ ।

त्यस दिन तीनकुनेमा आफ्नो कानको छेउबाट गोली गएको उनले बताएका छन् । आफू हाल काठमाडौँको कुनै एक मन्दिरमा बसेको उनले जिकिर गरेका छन् । आफू नभागेको पनि उनले बताएका छन् ।