काठमाडौँ, २४ असोज । रूसी राष्ट्रपति भ्लादिमिर पुटिनले अजरबैजानका राष्ट्रपति इल्हाम अलिएभलाई ३८ जना सवार विमान रूसी क्षेप्यास्त्र प्रहारमा पर्नुको कारण बताएका छन् ।
गत वर्ष एक युक्रेनी ड्रोन रूसी हवाई क्षेत्रमा प्रवेश गरेपछि कसरी अजरबैजान एयरलाइन्सको विमाननजिकै दुईवटा रूसी क्षेप्यास्त्रहरू विस्फोट भएका थिए भन्ने विषय उनले स्पष्ट पारेका हुन् । यही कारणले उक्त विमान दुर्घटना भएको थियो ।
पुटिनले यो घटनाबाट प्रभावित व्यक्तिहरूलाई क्षतिपूर्ति दिने आश्वासन दिएका छन् । गत डिसेम्बर २५ मा उडान जे २–८२४३ अजरबैजानको राजधानी बाकुबाट चेचन्याको राजधानी ग्रोज्नी जाँदै गर्दा कजाखस्तानको अक्ताऊनजिकै दुर्घटनाग्रस्त भएको थियो ।
युक्रेनी ड्रोनले धेरै स्थानमा हमला गरिरहेकाले यो विमान रूसको दक्षिणी भागबाट बाटो परिवर्तन गरी आएको थियो । उक्त दुर्घटनामा ३८ जनाको ज्यान गएको थियो ।
बिहीबार सार्वजनिक भएको एक भिडियोमा ताजकिस्तानमा द्विपक्षीय बैठकअघि पुटिन र अलिएभ हात मिलाउँदै र मुस्कुराउँदै गरेको देखिएका थिए । पुटिनले सोही बैठकमा विमान दुर्घटनाको विषयलाई उठाएका थिए ।
गत वर्ष पुटिनले अलिएभसँग सार्वजनिक रूपमा माफी मागेका थिए । रूसले युक्रेनी ड्रोन हमलाहरू रोक्नका लागि आफ्नो वायु रक्षा प्रणाली तैनाथ गरेका कारण रूसी हवाई सीमामा उक्त विमान दुर्घटनाग्रस्त भएको थियो ।
बिहीबार पुटिनले यस विषयमा थप्दै भने, “यस्ता घटनाहरूमा रूसी पक्षले आवश्यक पर्ने सबै कुरा गर्नेछ । क्षतिपूर्तिदेखि लिएर कानुनी रूपमा सबै औपचारिकताहरूको मूल्यांकन गरिनेछ ।” रोयटर्स
प्रतिक्रिया दिनुहोस्