उद्योगमा बिजुली कटौतीपछि खेर गयो ३ सय मेगावाट बिजुली: ३० हजारभन्दा बढी श्रमिक प्रभावित

काठमाडौँ, १४ कार्तिक । नेपाल विद्युत् प्राधिकरणले डेडिकेटेड तथा ट्रंकलाइन विवादमा ठूला उद्योगको लाइन काटेपछि करिब तीन सय मेगावाट विद्युत् खेर जान थालेको ऊर्जा उत्पादकहरूले बताएका छन् । वर्षायाममा समेत बिजुली खेर गइरहेको र दसैं–तिहारमा उद्योग बन्द भएर माग कम भइदिँदा बिजुली खेर जाने अवस्था सिर्जना भएको उनीहरूको भनाइ छ ।

यस वर्षको तिहारको छेकोमा प्राधिकरणले २५ उद्योगको बिजुली काटेपछि थप विद्युत् खेर गएको हो । धेरै विद्युत् खपत गर्ने दर्जनौं ठूला उद्योगमा एकै पटक विद्युत् लाइन काटिदिएपछि तीन सय मेगावाट बिजुली खेर गएको छ ।

नेपालको कुल जडित क्षमता ३ हजार ७ सय मेगावाट पुग्दा निजी क्षेत्रको उत्पादन क्षमता मात्रै ३ हजार मेगावाट छ । प्राधिकरणका अनुसार एक हजारभन्दा बढी बिजुली निर्यात भइरहेको छ । डेडिकेटेड र ट्रंकलाइन बक्यौता विवादमा उद्योगीले टाइम अफ डे (टीओडी) मिटरको बिल माग गरिरहेका छन् भने प्राधिकरणले बिल दिइसकेको भन्दै बक्यौता तिर्न ताकेता गर्दै आएको छ ।

उद्योगी र प्राधिकरण आआफ्नै अडानमा बसेपछि नेपाल उद्योग परिसंघले वार्ता संवादबाट समाधान गर्न आग्रह गरेको छ । परिसंघले बिहीबार प्रेस विज्ञप्ति जारी गर्दै विवाद समाधानका लागि तत्काल वार्ता संवादमा बस्न उद्योगी एवं सरकारसमक्ष आग्रह गरेको हो । आवश्यक परे वार्ता संवादका लागि सहजीकरण गर्न परिसंघ तयार रहेको समेत जनाएको छ । ‘वर्षौंदेखि गिजोलिएको डेडिकेटेड र ट्रंकलाइनसम्बन्धी विवाद समाधान गर्न परिसंघले तत्कालीन सरकारलाई एक उच्चस्तरीय आयोग बनाउन सुझाव दिएको थियो,’ विज्ञप्तिमा भनिएको छ ।

‘मुलुकको अर्थतन्त्र चुनौतीपूर्ण अवस्थामा रहेको, उत्पादनमूलक उद्योगहरूले न्यून क्षमतामा वस्तु उत्पादन गरी जेनतेन उद्योग सञ्चालन गरिरहेको अवस्थामा केही उद्योगमा प्राधिकरणले बिजुलीको लाइन काट्दा ती उद्योग थप मर्कामा पर्नुका साथै ती उद्योगमा कार्यरत श्रमिकसमेत मारमा परेका छन्,’ विज्ञप्तिमा भनिएको छ, ‘त्यसैले विवाद समाधानका लागि तत्काल वार्ता संवादमा बस्न उद्योगी एवं सरकारसमक्ष परिसंघ हार्दिक आग्रह गर्दछ ।’ यसैबीच समग्र उद्योग ट्रेड युनियन, नेपाल (हविन) ऊर्जा मन्त्रालय र नेपाल विद्युत् प्राधिकरणद्वारा देशका केही उद्योगहरूको बिजुली काट्ने निर्णयप्रति आपत्ति जनाएको छ । ऊर्जामन्त्री कुलमान घिसिङको निर्देशनमा केही ठूला औद्योगिक प्रतिष्ठानको बिजुली आपूर्ति बन्द गरिएपछि ती उद्योगमा कार्यरत ३० हजारभन्दा बढी श्रमिक प्रत्यक्ष वा अप्रत्यक्ष रूपमा प्रभावित भएको हविनको भनाइ छ ।

‘सरकारको यो कार्यले हजारौं श्रमिकको रोजगारी, आम्दानी र जीविकोपार्जन संकटमा पारेको छ, जुन पूर्ण रूपमा गैरजिम्मेवार, अमानवीय, राष्ट्र र श्रमिकविरोधी काम हो,’ विज्ञप्तिमा भनिएको छ, ‘ऊर्जामन्त्रीको सन्की निर्णयले राष्ट्रको उत्पादन रोक्ने अपराधपूर्ण काम बन्द गरी प्रभावित उद्योगको बिजुली अविलम्ब जोड्न युनियन जोडदार माग गर्दछ ।’