एमाले संकटबाट भाग्ने होइन, सामना गर्ने पार्टी हो : महासचिव पोखरेल

नेपालगञ्ज, २९ कार्तिक । नेकपा (एमाले)का महासचिव शंकर पोखरेलले एमाले संकटबाट भाग्ने होइन त्यसको सामना गर्ने पार्टी भएको बताउनुभएको छ ।

पार्टीले आयोजना गरेको प्रतिगामी षडयन्त्रका विरुद्ध जनपरिचालन कार्यक्रम अन्तरगत नेपालगञ्जको जनसभालाई सम्बोधन गर्दै महासचिव पोखरेलले वर्तमान देशको संकटको निकास एमालेको अगुवाईमा मात्र सम्भाव रहेको बताउनुभएको छ ।

भदौ २३ र २४ गतेको तोडफोड र विध्वंस नेपाल राज्यलाई कमजोर पार्नका लागि रचिएको षडयन्त्र भएको उहाँको भनाइ छ । सिंहदरबार,सर्वोच्च अदालत जस्ता निकायमा आगो लगाएर राज्य माथी गम्भिर अपराध गरिएको उहाँको भनाइ छ । यसमा को को संलग्न थिए भन्ने कुरा खुल्दै जाने पोखरेलले बताउनुभयो । यस विध्वंसमा काठमाडौं महानगरका प्रमुख बालेन्द्र साहको संलग्नताप्रति लक्षित गर्दै पोखरेलले भन्नुभयो ‘देशैभरीका धेरै स्थानीय तह र वडा कायालयहरु जलाइए । तोडफोड गरिए । तर काठमाडौं महानगरमा केही गरिएन । वडाहरुमा केही गरिएन । शितलनिवास जलाइयो छेउमै रहेको निर्मल निवासमा एउटा ढुंगा पनि लागेन । यसबाट यो आगजनी र तोडफोडमा को संलग्न छ भनेर सहजै बुझ्न सकिन्छ ।’

 महासचिव पोखरेलले एमालेका नेता कार्यकर्ता देशमा लोकतन्त्र ल्याउनका लागि लामो समय जेल बसेका,भूमिगत बसेका भएकोले लोकतन्त्र विरोधी सानातिना हमलाबाट बिचलित हुनु नहुने बताउनुभयो । ‘एमालेका नेता कार्यकर्ता लोकतन्त्र प्राप्तीका लागि लामो समय जेल बस्यौं । लामो समय भुमिगत बस्यौं । त्यसैले हामीलाई संकटसँग जुध्ने अनुभव छ’ पोखरेलले भन्नुभयो ‘षडयन्त्रकारीलाई लागेको थियो पार्टी कार्यलय जलाएपछि एमाले सकिन्छ । घर जलाइपछि नेता कार्यकर्ता सकिन्छन् । तर अहिले मैदानमा हेर्नुभयो भने एमाले भन्दा अरु कुनै शक्ति देख्नु भएको छ ? ’

 उहाँले राजनीतिक दलका कार्यकर्तालाई उच्च मनोबलका साथ पार्टी काममा खटिन आह्वान गर्नु भएको छ ।