एमाले महासचिवमा पृथ्वीसुब्बा गुरुङको दाबी

काठमाडौँ, १५ मंसिर । नेकपा (एमाले)का उपमहासचिव पृथ्वीसुब्बा गुरुङले आगामी ११ औँ महाधिवेशनमा महासचिव पदमा दाबी गर्ने भएका छन् ।

सोमबार एमाले निकट प्रेस चौतारीले गरेको अन्तरक्रिया कार्यक्रममा गुरुङलाई आगामी महाधिवेशनमा कुन पदमा दाबी गर्नुहुन्छ भनेर सञ्चारकर्मीले सोधेको प्रश्नमा गुरुङले महासचिव पदमा दाबी गर्ने बताएका हुन् । 

गुरुङले भने, ‘महासचिवमै दाबी गरेको छु मैले । हाँसेर छोटो जवाफ दिँदै ‘दाबी गर्न त पाइन्छ नि !’  एमालेमा ओली समूहबाटै शंकर पोखरेल, प्रदीप ज्ञवाली र गुरुङ गरी तीन जना महासचिवका आकाङ्क्षी देखिएका छन् ।

एमालेको ११ औँ महाधिवेशनमा अध्यक्षका लागि केपी शर्मा ओली र वरिष्ठ उपाध्यक्ष ईश्वर पोखरेले लड्ने बताइसकेका छन् ।