हवाई जहाजको अधिकतम भाडादर समायोजन (सूचीसहित)

काठमाडौँ, १८ पौष । नेपाल नागरिक उड्डयन प्राधिकरण (क्यान) ले आन्तरिक उडानतर्फको इन्धन शुल्क (फ्युल सरचार्ज) घटाएको छ ।

हवाई इन्धनको मूल्यमा घटेपछि प्राधिकरणले यस्तो सरचार्ज समायोजन गरेको हो । नेपाल आयल निगमले बुधबार हवाई इन्धनको मूल्य प्रतिलिटर ६ रुपैयाँ कटौती गरेको थियो । यसको आधारमा प्राधिकरणले शुक्रबार नयाँ इन्धन शुल्क निर्धारण गरेको हो । योसँगै हवाई जहाजको अधिकतम भाडा दर घटेको छ । 

प्राधिकरणका अनुसार ट्रंक रुटका लागि प्रतिमिनेट ६८.०९ रुपैयाँ र दुर्गम क्षेत्रका लागि प्रतिमिनेट ४८.६४ रुपैयाँ इन्धन शुल्क कायम गरिएको छ।

नयाँ भाडा दर अनुसार काठमाडौँबाट हुने उडानमा सबैभन्दा धेरै धनगढी रुटमा २६५ रुपैयाँले शुल्क घटेको छ भने सबैभन्दा कम सिमरा रुटमा ५५ रुपैयाँले घटेको छ । काठमाडौँबाट उडान भर्ने रुटमा देहाय बमोजिमको सरचार्ज शुल्क घटेको छ । 

उल्लेखित बाहेक माउन्टेन फ्लाइटमा २१० रुपैयाँ, काठमाडौँ–लुक्ला ८० रुपैयाँ, काठमाडौँ–जोमसोम  १२० रुपैयाँ, काठमाडौँ–फाप्लु ७० रुपैयाँ, काठमाडौँ–जुम्ला १९० रुपैयाँ, नेपालगन्ज–सिमिकोट १२० रुपैयाँ फ्युल सरचार्जबापत समायोजन भएको छ । 

प्राधिकरणले सरचार्ज बापतको शुल्क घटाए पनि यसको प्रत्यक्ष असर भने पर्ने छैन । अहिले एयरलाइन्स कम्पनीहरूले लिँदै आएको भाडा दर अधिकतम भाडा दर भन्दा निकै तल हुन्छ । 

उदाहरणको लागि काठमाडौँबाट धनगढीको अधिकतम भाडा १७ हजार रुपैयाँभन्दा माथि छ । तर अहिले सो रूपमा ८ हजार रुपैयाँ हाराहारी मात्रै लाग्ने गरेको छ । त्यसैले यसले प्रत्यक्ष रूपमा प्रभाव नपरे पनि हवाई ट्राफिक बढी हुने समयमा भने यसले मूल्यको सीमा कायम गर्न सक्छ ।