काठमाडौँ, २२ पौष । नेकपा (एमाले)का नेता गोकुल बास्कोटाले फागुनमा घोषणा गरिएको निर्वाचन प्रक्रिया अझै स्पष्ट गन्तव्यमा नपुगेको टिप्पणी गर्नुभएको छ ।
सामाजिक सञ्जालमार्फत आफ्नो धारणा सार्वजनिक गर्दै उहाँले चुनाव सुरुङमार्गको प्रवेशमै अल्झिएको जस्तो देखिएको उल्लेख गर्नुभएको छ । बास्कोटाले चुनावको कुरा २०८४ सम्मै मात्र सीमित हुने कि त्यसपछि पनि निरन्तर टर्दै जाने भन्ने अन्योल कायमै रहेको सङ्केत गर्नुभएको छ। ‘नेपाली राजनीतिमा कहिल्यै अन्त नहुने, मनचिन्ते झोली नखुले हुने अवस्था देखिन्छ,’ उहाँले लेख्नुभएको छ।
उहाँको भनाइले निर्वाचनको समयसीमा, राजनीतिक स्थिरता र निर्णय क्षमतामाथि प्रश्न उठाएको छ। बास्कोटाले ‘दिल्ली टाढा छैन भन्छन्, के हो के हो?’ भन्दै राजनीतिक निर्णयमा बाह्य प्रभाव र अनिश्चितताको आशङ्का पनि व्यक्त गर्नुभएको छ।
नेता बास्कोटाको यो अभिव्यक्तिलाई वर्तमान राजनीतिक तरलता र निर्वाचनप्रतिको अन्यौलतासँग जोडेर हेरिएको छ। साथै केही निर्णय लिनु पर्याे कि दिल्ली धाउने नेपाली राजनीति प्रति पनि उहाँको कटाक्ष छ । यतिबेला नेपाली कम्युनिष्ट पार्टीका संयाेजक पुष्पकमल दाहाल प्रचण्ड र नेपाली कांग्रेसकी नेतृ आर्जु राणा देउवा दिल्ली भ्रमणमा हुनुहुन्छ ।
उहाँले फेसबुकमा लेख्नु भएकाे छ, ‘फागुनमा घोषित चुनाब सुरुङ मार्ग प्रवेश भएछ तर कुरा चैँ चौरासीसम्मै हो झन् या पछिसम्म हो चुनावकै भईरहने भएछ, नेपाली राजनीतिमा कहिल्यै अन्त नहुने मनचिन्ते झोली नखुले हुने। दिल्ली दूर नहिँ भन्छन्, के हो के हो ?’
प्रतिक्रिया दिनुहोस्