चुनावमा बढीभन्दा बढी युवा उम्मेदवार समेट्दैछौं : प्रचण्ड

काठमाडौँ, २७ पौष । नेपाली कम्युनिस्ट पार्टीका संयोजक पुष्पकमल दाहालले आगामी निर्वाचनमा पार्टीले युवालाई उम्मेदवार बनाउने बताएका छन् ।

आज जेनजी रेडफोर्सले आयोजना गरेको आयोजना गरेको जेन–जी जागरण तथा वृहत सांस्कृतिक कार्यक्रममा बोल्दै उनले युवाहरूलाई प्राथमिकतामा राखेर उम्मेदवार बनाउने बताएका हुन् ।

उनले भने, ‘हामीले अहिले पार्टी निर्माणको क्रममा होस् या चुनावमा । समानुपातिक लिष्ट तयार पार्दा होस् या प्रत्यक्ष निर्वाचनमा पनि युवा र नवयुवा जो जेन–जी पुस्ताका युवाको रुपमा चिनिन्छन् । उनीहरूलाई उच्च प्राथमिकता दिने हामीले कोशिस गरेका छौं,’ ।

समानुपातिकको बन्दसूचीमा पनि युवाहरूलाई प्राथमिकतामा राखेको र प्रत्यक्षतर्फ पनि युवा तथा जेनजी पुस्ताका नवयुवाहरूलाई उम्मेदवार बनाउने जानकारी दिए । उनले भने, ‘हामीले जेनजी पुस्ताको मुस्कान खातुनलाई अगाडी सारेर हजारौँ लाखौँ युवाहरूलाई सम्बोधन गर्न खोजेका छौं । आउने दिनमा पनि प्रत्यक्ष वा समानुपातिकमा पनि बढि भन्दा बढी युवाहरूलाई र केन्द्रिय समितिमा पनि बढि भन्दा बढी युवाहरूलाई हामी समेट्दै छौं,’ ।