बालेनको डेरामा चोरी गर्ने तीनजना पक्राउ

काठमाडौँ, २५ माघ । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह ‘बालेन’को डेरामा चोरी गर्ने तीनजनालाई प्रहरीले पक्राउ गरेको छ ।

प्रहरीका अनुसार पक्राउ पर्नेमा काठमाडौँ बाँसवारीका ४२ वर्षीय मनीष राजवहाक, सिन्धुपाल्चोकका खिमबहादुर खड्का र धादिङका सञ्जय श्रेष्ठ छन् ।

उनीहरूलाई काठमाडौँ प्रहरीको विशेष टोलीले काठमाडौँका विभिन्न ठाउँबाट पक्राउ गरेको हो । 

उनीहरूले केही दिनअघि महाराजगन्जको चप्पल कारखानस्थित बालेनको कोठामा चोरी गरेका थिए । 

चोरी गर्ने समूहका तीनैजना यसअघिसमेत विभिन्न कसुरमा पक्राउ परेका आरोपी हुन् ।

उनीहरू भदौ २४ मा भएको जेनजी प्रदर्शनका क्रममा नक्खु कारागारबाट भागेका खुलेको छ ।