दैनिक उपभोग्य वस्तुको मूल्य शत प्रतिशत वृद्धि,राज्य विचौलियाको कब्जामा

काठमाडौं, २ साउन। नेकपा एमालेले प्रधानमन्त्री शेरबहादुर देउवा नेतृत्वको सरकार बनेको एक वर्षमा मुलुकमा कुशासनले सीमा नाघेको र राज्य बिचौलियाको कब्जामा गएको भन्दै मूल्यवृद्धिको ग्राफ नै सार्वजनिक गरेको छ ।

एमालेको उपभोक्ता हित संरक्षण तथा सुशासन विभागले आज देउवा सरकारको बदमासीका कारण मूल्यबृद्धि भएको ठहरसहित ग्राफ सार्वजनिक गरेको हो । बिभागले आयोजना गरेको अन्तरक्रियामा एमालेले सरकार छाडेको एक वर्षमा उपभोग्य वस्तुको मूल्य शत प्रतिशतसम्म वृद्धि भएको तथ्यांक सार्वजनिक गरेको हो ।
विभागका प्रमुख यज्ञराज सुनुवारले सुशासनका दृष्टिले बितेको एक वर्ष भ्रष्टाचार र राज्यको बिचौलियाकरणमा परिणत भएको र दैनिक उपभोग्य वस्तुको मूल्य कहालीलाग्दो ढंगले वृद्धि भएको बताउनु भयो । उहाँले अब एमालेको उपभोक्ता हित संरक्षण तथा सुशासन विभागले नियमित अनुगमन गरेर सत्यतथ्य सार्वजनिक गर्ने तथा सडक र संसदबाट भण्डाफोर गर्ने जानकारी पनि दिनुभयो ।

एमालेले सार्वजनिक गरेको तथ्यांकअनुसार दैनिक उपभोग्य वस्तुका साथै निर्माण सामग्री र इन्धनमा मूल्यवृद्धि गर्दा निश्चित व्यापारीलाई पहिले नै जानकारी दिएर स्टक गर्न लगाइएकोसमेत पाइएको छ । यस्तै सरकारमा बसेका व्यक्तिहरु नै कालोबजारीमा संलग्न रहेको पनि एमालेले जनाएको छ ।

कार्यक्रममा एमाले उपमहासचिव प्रदीप ज्ञवालीले राजनीतिका नाममा अहिले देशमा वित्तीय गठबन्धन र बिचौलियाको राज चलेको दृष्टान्त राख्नुभयो । एमालेले गठबन्धन सरकार आएपछि सार्वजनिक यातायातमा २८ प्रतिशत र ढुवानी भाडामा २६ प्रतिशत मूल्यवृद्धि गरिएको जनाएको छ ।