महानगरका ज्येष्ठ नागरिकलाई घरघरमा स्वास्थ्य सेवा सुरु

शर्मीला पाठक
काठमाडौँ, १५ असार । काठमाडौँ महानगरपालिकाले आजदेखि महानगरभित्रका ८८ वर्ष उमेर पुगेका ज्येष्ठ नागरिकलाई घरघरमा स्वास्थ्य सेवा सुरु गरेको छ ।

महानगरपालिकाभित्रका ज्येष्ठ नागरिकलाई जीवनप्रति सकारात्मक सोचको विकास एवम् उनीहरुमा भएका रोगको निदान गरी स्वस्थ्य जीवन बाँच्न प्रेरित गर्ने उद्देश्यले महानगरपालिकाले सो अभियान सुरु गरेको हो । अभियानको आज प्रमुख विद्यासुन्दर शाक्य थालनी गर्नुभयो ।

यो अभियान सुरुसँगै अब नियमित रुपमा महानगरका ज्येष्ठ नागरिकले उपचार पाउने छन् । महानगरको यही असार ६ गतेको दोस्रो कार्यपालिका बैठकले सो अभियान सुरु गर्ने निर्णय गरेको थियो ।

महानगरको ३२ वटै वडालाई आठ वटा क्षेत्रमा विभाजन गरी आज पहिलो नन्दी रात्रि मावि, वडा नं १ नक्साल क्षेत्रबाट ज्येष्ठ नागरिक सामाजिक सुरक्षा भत्ता वितरण एवम् नागरिकको घरमै गएर स्वास्थ्य परीक्षण कार्यक्रम सुरु गरेको हो । अठासी वर्ष उमेर पूरा भएका महानगरका ५९६ व्यक्तिको घरमा महानगरका प्रतिनिधि पुग्नेछन् । यसरी घरमा जाने टोलीमा चिकित्सक, स्टाफ नर्स, अनमी र अहेब एक÷एक जना हुनेछन् ।
आज पहिलो दिन वडा नं १ मा छ जना वृद्धालाई रु १२ हजार महानगर भत्ता वितरण गर्नाका साथै स्वास्थ्य परीक्षण गरिएको छ ।