अमेरिका, ८ असोज । प्रधानमन्त्री केपी शर्मा ओलीले हिमालय क्षेत्रले जलवायु सन्तुलनलाई कायम राखेको बताएका छन् ।
अमेरिकाको न्युयोर्कमा रहेको कोलम्बिया विश्वविद्यालयमा ‘वर्ल्ड लिडर्स फोरम’ अन्तर्गत ‘नेपालको लोकतन्त्र र आर्थिक समृद्धिको बाटो’ का विषयमा प्रस्तुति दिएपछि भएको अन्तरक्रियामा प्रधानमन्त्री ओलीले हिमालय नेपालका लागि मात्र नभएर संसारकै लागि महत्त्वपूर्ण भएको प्रस्ट पारेका हुन् । ओलीले जलवायु परिवर्तनमा नेपाल सचेत रहेको र विश्व पनि सचेत हुनुपर्ने बताए । उनले जलवायु परिवर्तनको असरबाट हामीले पृथ्वी र जनतालाई बचाउनुपर्ने पनि बताए । ओलीले हिमालयले जलवायु सन्तुलनलाई कायम राखेको उल्लेख गरे ।
प्रधानमन्त्री ओलीले भने, ‘यदि हिमालयसँग हिउ छ र विस्तारै पग्लिन्छ भने ठीक हुन्छ । समुन्द्र र हिमालयको पारिस्थितिक प्रणाली हुन्छ । समुन्द्रमा फोहोर भयो भने त्यो फोहोर बाफ बनेर बादल बन्छ र हिमालयमा पर्छ र हिउँलाई असर गर्छ । नेपालमा ४६ प्रतिशत वन क्षेत्र छ । १७ प्रतिशत हिमालय क्षेत्र छ । यस्तै, नदी र कुवा–तलाउ छन् । समग्रमा ७० प्रतिशतभन्दा बढी क्षेत्र जलवायु क्षेत्रलाई योगदान गर्छ,’ उनले भने,‘हामीले पृथ्वी र जनतालाई बनाउनुपर्छ ।’
प्रतिक्रिया दिनुहोस्