चिर्पट प्रहार गरी श्रीमान्‌को हत्या

रुकुम पश्चिम, ४ मंसिर । रुकुम पश्चिमको चौरजहारी नगरपालिका–२, विजयश्वरीमा ४० वर्षीय श्रीमान् मधु कुमालको हत्या गरेको आरोपमा ३२ वर्षीया दीपा कुमाललाई प्रहरीले पक्राउ गरेको छ ।

जिल्ला प्रहरी कार्यालयका सूचना अधिकारी एवं प्रहरी निरीक्षक ऋषि पाठकका अनुसार आज बिहान दीपाले चिर्पटले श्रीमान्‌को टाउकोमा प्रहार गरेर हत्या गरेको हो ।

चिर्पटले टाउकोमा प्रहार गरेर मृतावस्थामा रहेको सूचना छोरा १८ वर्षीय खिमकुमालले प्रहरीलाई दिएका थिए । सूचनालगत्तै इलाका प्रहरी कार्यालय चौरजहारीबाट गएको टोलीले आरोपित महिलालाई नियन्त्रणमा लिएको छ ।

शव परीक्षणका निम्ति जिल्ला अस्पताल ल्याउने तयारी भइरहेको प्रहरीले जनाएको छ ।