‘अनधिकृत’ सुविधा लिइरहेका तीन पूर्वअधिकारीले सवारीसाधन फिर्ता गरे: अर्थमन्त्री खनाल

काठमाडौँ, १४ असोज । अन्तरिम सरकारका अर्थमन्त्री रामेश्वरप्रसाद खनालले ‘अनधिकृत’ रूपमा सुविधा लिइरहेका तीन पूर्वअधिकारीले सवारीसाधन फिर्ता गरेका बताएका छन् ।

पूर्वसभामुख/राष्ट्रियसभाका पूर्वअध्यक्षहरूमध्ये कृष्णबहादुर महरा, ओनसरी घर्ती र गणेशप्रसाद तिमिल्सिनाले सरकारी गाडी फिर्ता गरेका उनले जानकारी दिए ।

“कानुनमा सवारीसाधन सुविधा दिने प्रबन्ध नभएको तर लिइरहनुभएका पूर्वसभामुख तथा राष्ट्रियसभा अध्यक्षहरूमध्ये कृष्णबहादुर महराज्यू, ओनसरी घर्तीज्यू र गणेशप्रसाद तिमिल्सिनाज्यूले सवारीसाधन फिर्ता गर्नुभएको आधिकारिक जानकारी प्राप्त भएको छ,” उनले मंगलबार फेसबुकमा लेखेका छन् ।

अन्तरिम सरकार गठनपश्चात् सबै कार्य कानुनानुसार भएको उनले स्पष्ट पारेका छन् । “सबै कुरा कानुनानुसार भएको छ । यदि, कानुनले अतिरिक्त र अनावश्यक विशेषाधिकार दिएको छ भने हामी अब केही गर्न सक्दैनौँ,” उनले भनेका छन्, “हामी कानुनी परिवर्तनको लागि तयारी गर्नेछौँ ।”

अनधिकृत प्रयोगका बारेमा नागरिकका रूपमा सबैजना चिन्तित हुनुपर्नेमा उनले जोड दिएका छन् । “अहिलेसम्म लगभग २१ पूर्वभीभीआईपीले सवारीसाधन र विशेषाधिकार फिर्ता गरिसकेका छन्,” उनले भनेका छन् ।