निर्वाचन आचार संहिताको पालना गर्ने उम्मेदवारको प्रतिबद्धता

म्याग्दी, १७ माघ । आसन्न प्रतिनिधिसभा सदस्य निर्वाचनमा म्याग्दीका उम्मेदवारहरूले निर्वाचन आचार संहिताको पालना गर्ने र जिल्लाको समग्र विकासमा सबै दलहरूबिच एकताबद्ध भएर लाग्ने प्रतिबद्धता जनाएका छन् ।

म्याग्दी जेसीजद्वारा शुक्रवार बेनीमा आयोजित प्रतिनिधि सभा सदस्य उम्मेदवारहरूसँग प्रत्यक्ष संवाद कार्यक्रममा विभिन्न राजनीतिक दलबाट उम्मेदवारका प्रत्याशीले यस्तो प्रतिबद्धता जनाएका हुन् ।

कार्यक्रममा नेपाली कांग्रेसका उम्मेदवार कर्णबहादुर भण्डारीले म्याग्दीको विकाससँगै शिक्षा, स्वास्थ्य र रोजगारीलाई मुख्य एजेण्डा बनाएर आफू चुनावमा होमिएको बताए । कार्यक्रममा नेकपा (एमाले) म्याग्दीबाट उम्मेदवार हरिकृष्ण श्रेष्ठले म्याग्दीको विकासका सवालहरूलाई चुनावी घोषणापत्रमा समेटेर अघि बढ्न विज्ञ सहितको टिमबाट चुनावी घोषणा पत्र तयारी गरेको बताए । नेकपा (माओवादी) का क्षेत्रबहादुर घिमिरेले जिल्लामा एकीकृत गुरुयोजना बनाएर विकास निर्माण गर्न, शिक्षा, स्वास्थ्योपचार लगायतलाई राज्यको मातहत राख्दै भ्रष्ट्राचार निवारण र सुशासनका लागि आफूलाई मतदान गर्न आह्वान गरेका छन् ।

कार्यक्रममा राष्ट्रिय स्वतन्त्र पार्टी (रास्वपा) का उम्मेदवार युवराज रोका, राष्ट्रिय प्रजातन्त्र पार्टी (राप्रपा) का उम्मेदवार डम्मरबहादुर सुवेदी, प्रगतिशील लोकतान्त्रिक पार्टीका देवेन्द्र कामी, श्रम संस्कृति पार्टीका विनोद राना, राष्ट्रिय जनमोर्चाका छेमबहादुर विश्वकर्माले समेत जिल्लाको पूर्वाधार निर्माण, सुशासन र मुलुकको आवश्यकता अनुसारको कानुन निर्माणका लागि संसदमा प्रभावकारी भूमिका खेल्न आफूहरू उम्मेदवार बनेर आएकोमा जोड दिएका थिए ।

म्याग्दीमा एक जना स्वतन्त्र र १२ जना राजनीतिक दलको उम्मेदवारी कायम रहेको छ । निर्वाचनकालागि एक निर्वाचन क्षेत्र र छ स्थानीयतह रहेको जिल्लामा ८६ हजार तीन सय ९७ जनामतदाता छन् । बयासी मतदान स्थल र एक सय २० वटा मतदान केन्द्र कायम छन् ।