विपन्नलाई सम्पन्न गराउने पार्टी काङ्ग्रेस मात्रै : वरिष्ठ नेता पौडेल

तनहुँ, १९ पौष । नेपाली काङ्ग्रेसका वरिष्ठ नेता रामचन्द्र पौडेलले नेपालमा रहेका विपन्नलाई सम्पन्न गराउने पार्टी काङ्ग्रेस मात्रै भएको दावि गर्नुभएको छ ।

ब्यास नगरपालिका–६ सिसाघाटस्थित श्याम्घा साना किसान सहकारीको चौथो साधारणसभाको आज उद्घाटन गर्दै नेता पौडेलले नेपालमा राजनीतिक क्रान्ति सकिएको चर्चा गर्दै अब आर्थिक क्रान्ति गर्ने पालो भएको र त्यो कृषिबाटै सम्भव रहेको उल्लेख गर्नुभयो ।

जुन पेशाबाट धेरै नाफा हुन्छ मानिस त्यतै आकर्षित हुने गरेको भन्दै नेता पौडेलले कृषिमा आकर्षण बढाउनुपर्नेमा जोड दिनुभयो । उहाँले कृषिलाई सम्मानित पेशा बनाउनुपर्नेमा जोड दिनुभएको छ । उहाँले भन्नुभयो, “नेपाललाई किसानको देश भनिन्छ तर कृषि पेशा अपहेलित छ, धेरै मिहिनेत गरेर थोरै मात्र आम्दानी हुने भएकोले कृषि पेशा अपहेलित छ ।”