एमसीसी अध्ययन गरेर परिमार्जनसहित अनुमोदन गरिन्छ : अध्यक्ष दाहाल

चितवन, १० फागुन । नेपाल कम्युनिष्ट पार्टी (नेकपा) अध्यक्ष पुष्पकमल दाहाल ‘प्रचण्ड’ले एमसिसी अध्ययन गरेर परिमार्जनसहित अनुमोदन गरिने बताएका छन् ।

आज चितवनमा पत्रकारहरुसँग कुराकानी गर्दै अध्यक्ष दाहालले अमेरिकी सरकारको सहायता कोष मिलेनियम च्यालेञ्ज कोअपरेसन (एमसिसी) परिमार्जनसहित अनुमोदन हुने बताएका हुन् ।

उनले भने, ‘एमसिसी कुनै बाइवल होइन यसलाई परिमार्जन गरेर अघि बढाइनेछ, प्रधानमन्त्रीले यस विषयमा अमेरिकी सरकारसँग पनि कुरा गरिसक्नुभएको छ ।’

अध्यक्ष दाहालले सरकारको कामका विषयमा आजदेखि शुुरु हुने सचिवालय बैठकले समीक्षा गर्ने बताउदै उनले वर्तमान सरकारले गरेका धेरै राम्रा कामहरुलाई पनि केही नराम्रा कामले छोपेको भन्दै यस विषयमा समीक्षा गरेर अघि बढ्ने बताए ।