थप एक जना कोरोना संक्रमितको मृत्यु

वीरगञ्ज, ३० भदौ । बाराका एक कोरोना संक्रमितको उपचारको क्रममा वीरगञ्जको नारायणी अस्पतालमा मृत्यु भएको छ ।

अस्पतालका प्रवक्ता एवम् बरिष्ठ चर्मरोग विशेषज्ञ डाक्टर अतुलेश कुमार चौरसियाका अनुसार बाराको जीतपुरसिमरा उपमहानगरपालिका–१४ डुम्मरवाना बस्ने ५५ वर्षीया महिलाको उपचारको क्रममा सोमबार साँझ ७:१५ बजे नारायणी अस्पतालमा मृत्यु भएको हो ।

उनलाई सोमबार बिहान ११ः१५ बजे नारायणी अस्पतालमा भर्ना गरिएको थियो । मधुमेह र हाइपरटेन्सनको समस्याले ग्रसित उनमा कडा कोभिड निमोनिया देखिएको थियो ।

तत्कालै आइसियू कक्षमा राखेर उपचार शुरु गरिएको थियो । जिन एक्सपर्ट विधिबाट कोरोना परीक्षण गर्दा संक्रमण पुष्टि भएको थियो । योसँगै वीरगञ्जमा कोरोना संक्रमणबाट मृत्यु हुनेको संख्या ६२ पुगेको छ ।