दोलखामा बन्ने भयो ‘फिल्म सिटी’

काठमाडौं, १ बैशाख । दोलखा जिल्लाको डाँङडुँगेडाँडामा अन्तर्राष्ट्रियस्तरको चलचित्र नगरी (फिल्म सिटी) बन्नेमा टुगो लागेको छ ।

मन्त्रिपरिषद्को बैठकले भीमेश्वर नगरपालिका–९ स्थित डाँङडुँगेडाँडामा चलचित्र नगरी बनाउन सूचना तथा सञ्चार मन्त्रालयअन्तर्गत रहेको चलचित्र विकास बोर्डलाई चलचित्र नगरी आयोजना निर्माण एवम् सञ्चालन गर्नका लागि लिखित निर्देशन दिए लगत्तै उक्त स्थानमा चलचित्र नगरी बन्ने पक्का भएको हो ।

आयोजनास्थलमा पर्ने राष्ट्रिय वन क्षेत्रको ७६।२५ हेक्टर जग्गा प्रयोग गर्न दिने र सोही स्थानमा रहेका एकसय चारवटा रूखबिरुवा हटाउन स्वीकृति दिएको छ ।

स्वीकृति लगत्तै २०७३ चैत १५ गते वन विभाग र चलचित्र विकास बोर्डबीच सम्झौता भएको छ । सम्झौता पत्र फिल्मसिटी निर्माण सहयोग समितिका संयोजक कलाकार मदनदास श्रेष्ठ र सह–संयोजक कुमार ध्वज कार्कीले चलचित्र विकास बोर्डमा अध्यक्ष राजकुमारलाई हस्तान्तरण गरेका छन् ।

चालु आर्थिक वर्षबाट नै फिल्म सिटीको निर्माण कार्य सुरु हुने चलचित्र विकास बोर्डका सदस्य उत्तम केसीले जानकारी दिए ।