बस दुर्घटना हुँदा ४० जना घाइते

दाङ, २१ मंसिर । पश्चिम रुकुम मुसिकोट नगरपालिका वडा नम्बर २ रातामाटामा बस दुर्घटना हुदा ४० जना घाइते भएका छन् भने घाइते मध्ये १० जनाको अवस्था गम्भिर रहेको छ । चार जनालाई थप उपचारका लागि रिफर गरिएको प्रहरीले बताएको छ ।

सोमबार साँझ जिल्लाको बाँफिकोट गाउँपालिका २ पिपलबाट दुलही लिएर मुसिकोट नगरपालिका १ घिमानेतर्फ फर्किरहेको ग १ ख २१०९ जन्ती बोकेको बस दुर्घटनामा परेको हो । बस सडकबाट १ सय मिटर तल खसेको थियो ।

गम्भिर घाइते हुनेमा मुसिकोट नगरपालिका वडा नम्वर १ का वडा अध्यक्ष बिरबल केसी, सोही वडाका सुशिल थापा, मानबहादुर ओली, सुरेन्द्र भण्डारी, नवराज खड्का, बिमला खत्री र प्रेम केसी भएको जिल्ला प्रहरी कार्यालयले जनाएको छ । सोही वडाका टेकबहादुर बस्नेत, चोपबहादुर बस्नेत र बुधुराम खड्का पनि गम्भिर घाइते भएका छन् ।

गम्भिर घाइतेमध्ये वडा अध्यक्ष केसी, सुशिल थापा, नवराज खड्कालाई थप उपचारका लागि जिल्ला अस्पतालले नेपालगञ्ज रिफर गरेको छ । मुसिकोट नगरपालिका १ कै बुधुराम खड्कालाई थप उपचारका लागि चौरजहारी अस्पताल रिफर गरिएको जनाइएको छ ।

सल्यानको छत्रेश्वरी गाउँपालिका वडा नम्वर ५ घर भएका चालक दोज बहादुर भण्डारी भने फरार रहेका छन् ।