आयोगद्वारा सामाजिक सञ्जाल ‘अकाउन्ट’को विवरण बुझाउन दल र उमेदवारलाई निर्देशन

काठमाडौँ, १८ बैशाख । निर्वाचन आयोगले राजनीतिक दलहरूले निर्वाचनमा प्रचारप्रसार गर्न सामाजिक सञ्जालको ‘अकाउन्ट’ प्रयोग गर्ने भए त्यसको विवरण बुझाउन निर्देशन दिइएको छ ।

आयोगका प्रवक्ता शालिग्राम शर्मा पौडेलले उमेदवारहरूले अन्तिम नामावली प्रकाशन भएको २४ घण्टाभित्र निर्वाचन अधिकृतको कार्यालयमा विवरण बुझाउनुपर्ने बताए ।

“राजनीतिक दल र उमेदवारहरूले आचारसंहिताको परिधिमा रही प्रचारप्रसार गर्न सामाजिक सञ्जाल खाताको प्रयोग गर्ने भएमा उमेदवारको अन्तिम सूचना भएको २४ घण्टाभित्र राजनीतिक दलको हकमा निर्वाचन आयोग र उमेदवारको हकमा सम्बन्धित निर्वाचन अधिकृतको कार्यालयमा विवरण अनिवार्य बुझाउन निर्देशन दिइएको छ,” उनले भने ।