स्वास्थ्य सेवाका समायोजन प्रक्रिया छिटो सम्पन्न हुन्छ : मन्त्रालय

काठमाडौँ, ३ भदौ । स्वास्थ् तथा जनसङ्ख्या मन्त्रालयले स्वास्थ्य सेवाका विभिन्न कार्यरत कर्मचारीको समायोजन प्रक्रिया छिटोभन्दा सम्पन्न हुने जनाएको छ ।

आज एक विज्ञप्ति जारी गर्दै मन्त्रालयले कर्मचारी समायोजन भएको पत्र छिटो साधनद्वारा कर्मचारी कार्यरत रहेकै स्थानमा पुग्ने गरी पठाउने व्यवस्था मिलाइएको जनाइएको छ ।

विज्ञप्तिमा भनिएको छ, ‘समायोजन तथा पदस्थापनसम्बन्धी कार्यलाई मन्त्रालयले उच्च प्राथमिकतामा राखि कार्य अगाडि बढाइरहेको छ । वर्षात तथा विपद्को सयममा खटिएका स्थानमा स्वास्थ्य सेवा प्रवाह गर्ने कार्यमा लागि रहन सबै तहका कर्मचारीलाई पुनः यसै सूचनाद्वारा स्मरण गराइन्छ ।’

विज्ञप्तिमा पद, नाम तथा स्तरवृद्धि सम्बन्धमा समायोजन प्रक्रिया सम्पन्न हुनासाथ प्रधानमन्त्री तथा मन्त्रिपरिषद्को कार्यालय, सङ्घीय मामिला तथा सामान्य प्रशासन मन्त्रालय तथा अर्थ मन्त्रालयसँग समन्वय गरी समस्या समाधान गरिने जनाइएको छ ।

स्वास्थ्य सेवामा क्रियाशील ट्रेड युनियनले पद, नाम र स्तरवृद्धिको समस्या सम्बोधन गर्न उपप्रधान तथा स्वास्थ्य तथा जनसङ्ख्यामन्त्री उपेन्द्र यादवको ध्यानाकर्षण गराउँदै आएका छन् ।