अवैध सुनचाँदीसहित एक जना पक्राउ

लहान, ६ पुस । अवैध सुनचाँदीको गरगहनासहित एक जनालाई प्रहरीले पक्राउ गरेको छ ।

गएराति भगवान्पुर गाउँपालिका–४ ठाडीबजारबाट प्रहरी चौकी ठाडी सिरहाबाट खटिएको टोलीले जाँच गर्ने क्रममा अवैध सुनचाँदीको गरगहनासहित गोलबजार नगरपालिका-४ निवासी ३४ वर्षीय मनोज रायलाई पक्राउ गरेको हो ।

भारततर्फबाट नेपालतर्फ आउँदै गरेको ज२प ६४२२ नंको मोटरसाइकल जाँच गर्ने क्रममा डिकीभित्र लुकाई-छिपाई राखिएको सुनचाँदीका गहना बरामद भएपछि रायलाई पक्राउ गरिएको जिल्ला प्रहरी कार्यालय सिरहाका प्रवक्ता प्रहरी नायब उपरीक्षक अपिलराज बोहराले जानकारी दिनुभयो ।

पक्राउ परेका रायको साथबाट हातमा लगाउने सुनको बाला दुई, मङ्गलसूत्र ठूलो-सानो गरी चार, नथी सिक्रीसहितको एक, कानमा लगाउने बाली दुई, टप दुई, झुम्का बाला टीका एक थान र चाँदीको पाउजु पाँच, हातमा लगाउने पञ्जा एक जोडी, ब्रासलेट एक थान, खुट्टामा लगाउने बिच्छी तीन थान, औँठी एक थान र बच्चाले लगाउने बलिया तीन थान बरामद भएको प्रवक्ता बोहराले बताउनुभयो । पक्राउ परेका रायमाथि थप अनुसन्धान भइरहेको प्रहरीले जनाएको छ ।