चितवनबाटै चुनाव लड्ने हो, जित पनि सुनिश्चित छ : अध्यक्ष दाहाल

काठमाडौँ, २४ भदौ । नेकपा माओवादी केन्द्रका अध्यक्ष पुष्पकमल दाहाल प्रचण्डले आफू चितवनबाटै चुनाव लड्ने स्पष्ट पारेका छन् ।

पोखरामा आज बिहान सञ्चारकर्मीसँग कुरा गर्दै उनले भने, “मलाई विभिन्न जिल्लाबाट अन्य पार्टीका साथीहरुले पनि आइदिनुपर्‍यो भन्नुभभएको छ, “कांग्रेसका नेताले गोरखा आइदिनुपर्‍यो भन्नुभयो । तर म अहिले चितवनबाटै लड्छु । चितवनका जनता, चेतना र भावनाप्रति विश्वास छ । गठबन्धन पनि छ । जित सुनिश्चित छ ।”

उनले चितवनभन्दा बाहिर जाँदा सन्देश राम्रो नजाने पनि बताए । “चितवन छाड्दा सन्देश राम्रो हुँदैन । त्यहाँ चुनाव लड्दा कहिँ न कहिँ नकारात्मक सन्देश जान्छ । चितवनमा जित्छु भन्नेमा पूर्ण विश्वासमा छु । हुन त म फरक फरक ठाउँबाट चुनाव लडेँ । प्रचण्ड देशभरिका जनताको हो भन्ने सन्देश दिनु थियो,” उनले भने, “अहिले चितवन छाडेर हिँडदा डराएर हिँडेको भन्ने हुन्छ । मैले त्यहाँ जित्छु पनि ।”