सभापति देउवा पत्नी आरजु नयाँ दिल्लीमा

काठमाडौँ, १ माघ । नेपाली कांग्रेसका सभापति शेरबहादुर देउवाको पत्नी तथा केन्द्रीय सदस्य एवं सांसद आरजु राणा आइतबार भारत गएकी छन् ।

आरजु फलोअपका लागि नयाँदिल्लीस्थित अस्पताल गएको उनको सचिवालयले जनाएको छ । गत साउनमा आरजुको दिल्लीस्थित म्याक्स अस्पतालमा पाठेघरसम्बन्धी शल्यक्रिया गरिएको थियो । उनले नयाँ दिल्लीमा रहँदा राजनीतिक भेटघाट गर्ने वा नगर्नेबारे जानकारी नभएको आरजुको सचिवालयका एक सदस्यले बताए ।

सचिवालय स्रोतले भन्यो, ‘उहाँ फलोअपका लागि जानुभएको हो । सोमबार अस्पतालमा परीक्षण गर्ने तयारी छ । उहाँ माघ ४ गते स्वदेश फर्कने कार्यक्रम छ ।’