उपसभामुखमाथि छानबिनको माग 

काठमाडौँ, ७ साउन ।  उपसभामुख इन्दिरा रानाले पदको दुरुपयोग गरी ५ जनालाई अमेरिका लग्ने गरी अमेरिकी दूतावासलाई पत्र लेखेको विषयमा पनि आइतबारको संसद् बैठकमा प्रश्न उठेको छ ।

संयुक्त राष्ट्रसंघको कार्यक्रममा भाग लिन जान लागेकी उपसभामुखले महिला अधिकारको अभियानसँग कुनै साइनो नभएका चार पुरुष र एक महिलालाई आफूसँगै लग्न प्रक्रिया अघि बढाइएकी थिइन् । आफूसँगै पाँच जना यो कार्यक्रममा जान लागेको भन्दै उनले भिसाको अन्तर्वार्ता छिटो सारिदिन अमेरिकी दूतावासलाई उपभामुखको लेटरप्याडमा पत्र लेखेकी थिइन् ।

बैठकमा कांग्रेस सांसद रामहरि खतिवडाले उपसभामुखले पत्र लेखेको विषयमा संसदीय छानबिन गर्नुपर्ने बताए । ‘यस्तो अवस्थामा उपसभामुखले संसद्को कमान्ड गर्न सुहाउँछ कि सुहाउँदैन ?,’ उनले प्रश्न गरे ।

माओवादीका सांसद माधव सापकोटाले संवैधानिक परिषद्मा सत्तापक्ष अल्पमतमा परेपछि उपसभामुख रानाले १ वर्षअघि लेखेको पत्र चर्चामा ल्याइएको दाबी गरे । उपसभामुखले लेखेको पत्रले राजनीतिक र नैतिक प्रश्न उठे पनि त्यो प्रश्नको नियतमाथि उनले आशंका व्यक्त गरेका छन् । रास्वपा सांसद सुमना श्रेष्ठले उपसभामुखले मानव तस्करी गरेको भनेर चरित्र हत्या गर्न खोजेको भन्दै आपत्ति जनाइन् ।

‘उपसभामुख इन्दिरा रानाको नामबाट मिडिया ट्रायल भइरहेको छ, यसमा आपत्ति जनाउन चाहन्छु,’ उनले भनिन्, ‘आचरण हेर्ने हो भने सबै जनाको लेटरप्याडबाट के–के निस्क्या छ हेरौं र साँच्चै पद्धति बनाऔं ।’ रास्वपाले उपसभामुख रानासँग जोडेर पार्टीको छविलाई धूमिल पार्ने प्रयास भएको जनाउँदै प्रेस विज्ञप्तिमार्फत आइतबार आपत्तिसमेत जनाएको छ ।