जाजरकोटमा पहिरोले वडा सदस्य दम्पती पुरिए

काठमाडौँ, २३ भदौ । पहिरो खस्दा जाजरकोटमा एक वडा सदस्य दम्पती नै बेपत्ता भएको पाइएको छ ।

जाजरकोट प्रहरीका अनुसार बारेकोट गाउँपालिका–६, धुमामा भन्ने ठाउँमा उक्त वडाका वडा सदस्य ३८ वर्षीय प्रेमकुमारी चलाउने र उनका ४० वर्षीय श्रीमान् मानबहादुर चलाउने पुरिएका हुन् ।

राति घरमाथिबाट आएको पहिरोले चलाउनेको घर पूर्ण रूपमा पुरेको हो । पहिरोले पुरिएकी उनकी ११ वर्षीय छोरीको भने उद्धार गरेर अस्पताल पठाइएको छ ।

चलाउने दम्पतीको अवस्था अझै अज्ञात रहेको छ । अहिले त्यहाँ प्रहरी र स्थानीयको उपस्थितिमा भत्किएको घर उधिन्ने काम भइरहेको छ ।