लालबकैया नदीमा एक युवकको शव फेला

रौतहट, १९ असोज । रौतहट कटहरिया नगरपालिका–१ भसेढवा स्थित लालबकैया नदी किनारमा एक युवकको शव फेला परेको छ ।

शुक्रवार साँझ सशस्त्र प्रहरी बल नेपाल फर्वाड सुरक्षा वेश जंगलशैया र प्रहरी चौकी हरिनगरको संयुक्त टोलीले अन्दाजी ४५ वर्षको देखिने पुरुषको शव बालुवामा पुरिएको अवस्थामा फेला पारेको हो । 

शवको पहिचान खुल्न नसकेको प्रहरीले जानकारी दिएको छ । शवलाई  पोस्टमार्टमका लागि प्रादेशिक अस्पताल गौर पठाएको प्रहरीले जनाएको छ । शवको प्रकृति हेर्दा केही दिन अघि नदीमा आएको बाढीले कतैबाट बगाएर ल्याएको हुनसक्ने प्रहरीले बताएको छ । यसबारे थप अनुसन्धान भइरहेको प्रहरीले जनाएको छ ।