काठमाडौँ, ५ कार्तिक । चलचित्र ‘१२ गाउँ’को सिक्वेल बन्ने भएको छ ।
‘१२ गाउँ’ राम्रोसँग चलेपछि निर्माणपक्षले यसको सिक्वेल बनाउने तयारी गरेको हो ।
एक सातामा १० करोडभन्दा माथि ग्रसकलेक्सन गरेको चलचित्र अहिले पनि सतप्रतिशत अकुपेन्सीमा चलिरहेको वितरक गोविन्द शाही बताउँछन् ।
उनका अनुसार निर्माणपक्षले १२ गाउँको सिक्वेल बनाउने तयारी गरेको छ । यसको स्टोरी पहिला नै थियो । त्यसमा थप काम भइरहेको छ । बलिदानको काम सकिएपछि १२ गाउँको सिक्वेलको काम हुनेछ । रिलिज पनि बलिदानपछि नै हुनेछ ।
सन्तोष सेनको निर्माण तथा निर्देशनमा तयार भइरहेको चलचित्र ‘बलिदान’को मुख्य भूमिकामा समीर भट्ट छन् । त्यसैले ‘बलिदान’को काम सकिएपछि मात्रै ‘१२ गाउँ’को सिक्वेल निर्माण हुनेछ ।
‘१२ गाउँ’ बिराज भट्टले निर्देशन गरेको चलचित्र हो । जसमा बिराज र समीर मुख्य भूमिकामा छन् ।
प्रतिक्रिया दिनुहोस्