‘पूर्ण बहादुरको सारङ्गी’ले एकै दिन कमायो ३ करोड ८९ लाख 

काठमाडौँ, २६ कार्तिक । चलचित्र ‘पूर्ण बहादुरको सारङ्गी’ले नेपाली चलचित्रको इतिहासमा नयाँ रेकर्ड बनाएको छ । यो एकै दिनमा सबैभन्दा धरै कमाउने चलचित्र बनेको छ । 

शनिबार यो चलचित्रले तीन करोड ८९ लाख ग्रसकलेक्सन गरेको छ । शुक्रबार दुई करोड ९९ लाख ग्रसकलेक्सन गरेको निर्माणपक्षले जनाएको छ । 

एकै दिन यति धेरै ग्रसकलेक्सन गर्ने यो पहिलो चलचित्र बनेको छ । यसअघि एकैदिनमा धेरै कमाउने चलचित्र ‘कबड्डी–४’ थियो, जसले पहिलो दिनमा २ करोड ९० लाख ग्रस कमाएको थियो । यसपछि ‘भष्मे डन’ले पहिलो दिन दुई करोड २५ लाख कलेक्सन गरेको थियो । 

प्रदर्शन भएको १० दिनमा यो चलचित्रले १७ करोड ९८ लाख ग्रसकलेक्सन गरेको छ । लक्ष्मिपूजाका दिन रिलिज भएको यो चलचित्रले सर्वाधिक धेरै शो पाउने चलचित्रको पनि रेकर्ड बनाएको छ । एकै दिन यो चलचित्रले ९८ हलमा ४६५ भन्दा धेरै शो पाएको थियो ।