पोलिटिकल लिडरसिपले छिमेकीसँग आँखामा आँखा जुधाएर कुरा गर्न सक्नुपर्छ : ईश्वर पोखरेल

काठमाडौँ, १० पौष । नेकपा एमालेका वरिष्ठ उपाध्यक्ष ईश्वर पोखरेलले छिमेकी राष्ट्रसँग कुनै पनि विषयमा आँखामा आँखा जुधाएर कुरा गर्न सक्नुपर्ने बताएका छन् ।

नेपाल पत्रकार महासंघका नयाँ निर्वाचित केन्द्रीय समितिलाई बधाई तथा शुभकामना दिन आयोजित कार्यक्रमलाई सम्बोधन गर्ने क्रममा उनले भने, ‘हाम्रा छिमेकीसँग संयोगले हिमालको पर्खाल खडा छ । धेरै कुरा संवेदनशील भएर प्रस्तुत हुन जरुरी छ,’ ‘हाम्रो पोलिटिकल लिडरसिपले के गरोस् भन्ने चाहन्छौं भने छिमेकीसँग आई टु आई कुरा गर्ने सामर्थ्य राखुन् । आफ्नो समस्यालाई प्रस्तुत गर्ने सामर्थ्य राखोस् ।’

पोखरेलले छिमेकी राष्ट्रलाई मुख छाडेर गाली गर्ने वा घुँडा टेक्ने अभ्यास रहेको भन्दै त्यसको विपक्षमा हुनुपर्ने जिकिर गरे ।

उनले भने, ‘कि छिमेकीलाई मनपरी मुख छाडेर गाली गने स्कुलिङ छ । कि भने घुँडा टेक्ने अभ्यास छ । हामी दुवै कुराको विपक्षमा हुनुपर्छ । हामी छिमेकीलाई मनपरी गाली गर्ने कुरा पनि गलत हो भन्छौं, घुँडा टेक्ने पनि गलत हो भन्छौं । हामी आई टु आई कुरा गर्नुपर्छ, प्रमाण र ऐतिहासिक दस्तावेजको आधारमा भन्नेमा छौं,’।